'Yan Bindiga Sun Kashe Jandarmomin Nijar 13 A Kan Iyakan Kasar Mali

Rahotanni daga kasar Nijar sun bayyana cewar wasu jandarmomin kasar su 13 sun mutu kana wasu biyar kuma sun sami raunuka sakamakon harin da wasu 'yan bindiga dadi suka kai musu a sansaninsu a yammacin kasar kusa da kan iyakan kasar da kasar Mali.

Kamfanin dillancin labaran Reuters ya ce maharan dai wadanda suka zo cikin motocin a kori kura da kuma  babura sun bude wuta a kan jandarmomin ne a sansanin na su da ke yammacin kasar ta Nijar kusa da kan iyakan kasar da kasar Mali.

Wasu majiyoyin tsaro da suke wajen sun bayyana cewar mutanen dai suna dauke ne da manyan makamai da bingigogi masu sarrafa kansu bugu da kari kan makaman harba rokoki.

Mahukuntan kasar Nijar din sun tabbatar da kai harin, inda suka ce maharan sun shigo kasar daga kasar Mali inda suka yada da zango a kauyen Ayorou mai nisan kilomita 40 daga kan iyakan kasar Malin kafin suka kai wannan harin.

Kauyen da aka kai harin dai yana kimanin 'yan wasu kilomitoci ne daga wajen da a kwanakin baya wasu maharan suka kai wani hari da yayi sanadiyyar mutuwar sojojin Amurka su 4. Mahukutan Nijar din dai sun ce suna ci gaba da gudanar da bincike kan lamarin kamar yadda ministan cikin gidan kasar Mohammed Bazoum ya tabbatar.