Tashin Bam Ya Hallaka Yara 5 A Tanzaniya

Shugaban 'yan sandar yankin Kagera na kasar tanzaniya ya sanar da tashin bam a cikin wata makaranta dake yankin.

Kamfanin dillancin labaran Associated Press ta nakalto shugaban 'yan sanda na yankin kagera mista Agustine Orumeh na cewa a wannan laraba wani bam ya tashi a wata makarantar piramire dake yankin lamarin da yayi sanadiyar mutuwar yara biyar.

Mista Agustine Orumeh ya kara da cewa bayan yara biyar din da suka rasa rayukansu akwai wasu 24 da suka samu raunuka sanadiyar tashin wannan bam, kuma tuni aka garzaya da su zuwa asibiti.

Tuni dai jami'an 'yan sanda sun fara gudanar da bincike domin gano yadda bam din ya tashi da kuma wadanda suka dasa shi.

Kasar tanzaniya dai na fuskantar hare-hare daga kungiyoyin daban daban saboda wata manufa ta siyasa.