Zimbabwe: Shugaba Robert Mugabe Ya yi Murabus.

Shugaban Majalisar kasar ta Zimbabwe Jacob Mudenda ne ya sanar da amincewar Mugabe da sauka daga kan mukamin nashi na shugabancin kasar.

Mugabe ya yi murabus ne bayan shekaru 37 yana kan mulkin kasar. Jim kadan bayan da aka sanar da murabus din na shugaban kasar, mutanen da suka yi cincirindo a bakin ginin majalisar dokokin kasar, sun fara biki da murna.

Wasikar da shugaban majalisar dokokin kasar ta Zimbabwe ya karanta, ta ambato Robert Mugabe yana cewa; Ya sauka daga mukaminsa ne bisa radin kansa, kuma saboda ya bada damar maye gurbinsa ba tare da matsala ba.

A ranar 15 ga watan Nuwamba ne sojojin kasar suka  fito kan tituna da motocin yaki tare da killace Mugabe a cikin gidansa.