Sudan Ta Kudu : Kiir Ya Sallami Fursunonin Siyasa

Shugaba Salva Kiir na Sudan ta Kudu, ya bada umurnin sakin dukkan fursunonin siyasa da kuma na yaki da ake tsare dasu a kasarsa.

Akwai dai fursunoni da dama da ake tsare dasu a barikin soji a Juba babban birnin kasar.

Wannan matakin na daga cikn yarjejeniyar da aka cimma da jagoran 'yan tawayen kasar Riek Mashar, a watan da ya gabata.

Manufar cimma yarjejeniyar ta zaman lafiya shi ne kawo karshen yakin basasa da aka kwashe sama da shekara biyar ana yinsa a wannan jinjira kasa ta Sudan ta Kudu.

Yarjejeniyar da aka cimma ta kuma tanadi M. Mashar ya dawo cikin gwamnati a mastayinsa na daya daga cikin mataimakan shugaban kasar Salva Kiir sun guda biyar.