Boko Haram Ta Kashe Sojoji 3 A Najeriya
Rahotanni daga najeriya na nuni da cewa kungiyar Boko haram ta kashe sojojin kasar a wani hari data kai wani sansanin soji a arewa maso gabashin kasar.
Bayanai sun ce mayakan sun kai harin ne a jiya Juma'a a kauyen Ngwom dake nisan kilomita 14 a arewacin Maiduguri babban birnin jihar Borno.
Wata majiyar soji daga yankin ta ce mayakan sun kuma sace motocin soji guda biyu, da kuma lalata wata motar soji mai sulke guda.
Maharan sun kuma kone gidaje biyu da kuma mota guda ta 'yan kato da gora.
Kawo yanzu ba a kai ga sanin ko wane bangare ne daga cikin kungiyar ta Boko haram ya kai harin ba, saidai bayanai sun nuna cewa hare haren baya bayan nan da ake kaiwa kan sojoji a jihar Borno da kuma Yobe dake makobtaka kungiyar nan ce dake bayyana kanta da reshen kungiyar (IS), a yammacin Afrika (ISWAP) ke daukan alhakin kaisu, ko kuma a alakanta ta dasu.
Sauren hare hare da ake kaiwa kuma kan fararen hula da hare haren kunnan bakin wake akan alakantasu dana da kungiyar Boko haram da Abubakar Shekau ke jagoranta.
Ko a karshen makon da ya gabata ma mutum 6 ne suka rasa rayukansu a wasu jerin hare hare da mayakan kungiyar boko haram suka kai a kauyukan Shuwa da Kirchina, dake garin Madagali, na jihar Adamawa a arewa maso gabashin kasar.
Rikicin boko haram wanda ya fara a shekara 2009, a arewa maso gabashin Najeriya, ya dai yi sanadin mutuwar mutane sama da 27,000 tare da tilastawa wasu miliyan 1,8 tsarewa daga muhallensu.
