Najeriya : Buhari Ya Yi Jawabi Bayan Sake Zabensa

Shugaban Najeriya Muhammadu Buhari ya yi wa magoya bayansa jawabi bayan da hukumar zaben kasar ta INEC ta tabbatar da shi a matsayin wanda ya lashe zaben shugaban kasar a karo na biyu.

Da farko shugaban ya gode wa Allah sannan kuma ya yi godiya ga miliyoyin 'yan Najeriya da suka sake zabensa.

A cikin daren jiya ne hukumar zabe mai zaman kanta a Najeriya ta sanar da sakamakon zaben shugaban kasar wanda ya bayyana Shugaba Muhammadu Buhari a matsayin wanda ya lashe zaben a karo na biyu.

Sakamakon ya nuna cewa shugaba Buhari na Jam'iyyar APC ya samu kuri'u 15,191,847, yayin da babban abokin hamayarsa na Jam'iyyar PDP, Alhaji Atiku Abubakar ya samu kuri'u 11,262,978, kamar yadda shugaban hukumar Zabe ta INEC, Farfesa Mahmood Yakubu ya bayyana a cikin daren jiya.

Sai dai kafin hakan jam'iyyar adawa ta PDP, ta yi watsi da sakamakon zaben da Hukumar ta INEC ta fitar.