Najeriya : Buhari Da Mataimakinsa Sun Karbi Shaidar Lashe Zabe Daga INEC

A gajeren jawabin da ya gabatar bayan karbar takardan shaidar, shugaba Buhari ya bayyana cewa zabe ba yaki ba ne don haka nasarar da ya samu ba tashi shi kadai ba ce, ko ta jam’iyyarsa ita kadai, nasara ce ta ‘yan Najeriya gaba daya.

Shugaban Buhari ya godewa ‘yan Najeriya fiye da miliyon 15 da su ka zabe shi a karo na biyu, ya kuma yi alkawarin zai yi iya kokarinsa na ganin ya kawo ci gaba a rayuwar ‘yan Najiriya gaba daya.

Dangane da muhimman ayyuka da zai sa a gaba a wannan zango na shugabancin kasar shugaban ya ambaci yaki da cin hanci da rashawa da kuma bin doka da oda a duk fadin kasar.

Daga karshe shugaban ya bayyana alhininsa da wadanda suka rasa rayukansu a lokacin zabe na ranar Asabar, inda ya roki Allah ya sa sun huta ya kuma bai wa danginu hakurin jure wannan rashin.