Bapalasdine Na Biyu Ya Yi Shahada A Cikin Sa'oi 24

Da safiyar yau laraba ne sojojin Sahayoniya su ka harbe wani matashin Bapalasdine a arewacin al-Khalil da ke yammacin kogin jordan.

Kafafen watsa labarun 'yan sahayoniya sun riya cewa matashin Bapalasdinen ya kai wa wani dan share wuri zauna hari ne da wuka. Nan take sojojin na Sahayoniya suka harbe shi da ya kai shi ga yin shahada.

A jiya Talata ma dai 'yan sahayoniyar sun kashe wani Bapalasdi mai suna Ahmad Nasr Jarrar wanda mamba ne na Hamas.

Tun bayan da shugaban kasar Amurka Donald Trump ya bayyana birnin Kudus a matsayin babban birnin haramtacciyar kasar Isra'ila, al'ummar Palasdinu suka fara boren nuna kin amincewa.