Sojojin Isra'ila Sun Kashe Wani Matashin Bafalasdine

Wani matashin Bafalasdine ya rasa ransa, sakamakon harbin bindiga da jami'an tsaron yahudawan mamaya na Isra'ila suka masa a yau Juma'a a yankin Hebron dake kudancin birnin Kudus.

Wata sanarwa da ma'aikatar kiwan lafiyar Palasdinu ta fitar, ta ce matashin mai suna Mohammed al-Jabari, dan shekaru 24 a duniya wanda ke fama da nakasa, ya yi shahada a asibiti, sakamakon harbin da jami'an tsaron Isra'ila suka masa.

Rundinar sojin Isra'ilar ta ce lamarin ya faru ne sakamakon rikicin da ya barke a lokacin da masu zanga-zanga suka farma wa sojoji, inda sojojin kuma suka buda wuta, amma an bude bincike kan lamarin a cewar kakakin rundinar sojin Isra'ilar.

A kalla Palasdinawa 30 ne suka yi shahada, a rikicin da ya biyo bayan ayyana birnin Qudus a matsayin babban birnin Isra'ila da shugaba Donald Trump na Amurka ya yi a ranar 6 ga watan Disamban bara.