Obama Ya Gargadi Shugaban Amurka Mai Jiran Gado Donald Trump

Shugaban Amurka mai barin gado Barack Obama ya ja gargadin shugaban Amurkan mai jiran gadon Donald Truimp da cewa koda ya sauka daga mulkin to fa ba zai yi shiru ba idan har Mr. Trump yayi kokarin dagula lamurra a Amurkan.

Shugaba Obama yayi wannan gargadin ne a ganawarsa ta karshe da yayi da manema labarai a fadar White House awoyi kafin ya sauka daga karagar mulkin Amurkan inda ya ce zai koma gefe ya ci gaba da rayuwarsa a matsayin dan kasa to sai dai ba zai yi shiru ba matukar yaga Mr. Trump din zai dagula lamurra a Amurkan.

Obama din dai yana mayar da martani ne dangane da irin maganganun da Trump din yake ci gaba da yi na sukar wasu siyasar gwamnatin Obaman da kuma batun takunkumin da aka sanya wa Rasha da kuma batun yarjejeniyar nukiliyan Iran.

A wani lokaci a yau din nan ne ake sa ran za a rantsar da Mr. Trump din a matsayin sabon shugaban Amurkan cikin farfagabar da wasu suke yi na cewa zai dagula lamurra a Amurkan.