Biritaniya : Mutane 22 Suka Mutu A Harin Manchester

Kawo yanzu, mutane 22 ne aka tabbatar da mutuwarsu, yayin da kusan 60 suka jikkata, sakamakon harin da aka kai a birnin Manchester na kasar Birtaniya.

Hukumomin yankin dai sun dauki al'amarin a matsayin harin ta'addanci.

Bayanai daga kasar sun ce wani mutum ne ya tayar da wani abu mai fashewa a filin a lokacin da ake tsaka da gudanar wasan nishadi.

Filin wasan na Manchester na iya daukar mutane 21,000, kuma kafafen yada labarai sun ruwaito cewa, filin a cike yake a lokacin da lamarin ya auku.