Mexico : Hadarin Jirgin Minista Ya Yi Ajalin Mutum 13

Hukumomin shari'a a jihar Oaxaca a kudancin Mexico, sun ce mutum 13 ne suka gamu da ajalinsu a yayin da wani jirgi mai saukar ungulu na ministan cikin gida na kasar, Alfonso Navarrete, dake kan hanyar zuwa yankin da girgiza kasa ta auka ma a jiya Juma'a ya yi hadari.

Sanarwar ta ce daga cikin mutanen da lamarin ya rutsa dasu da akwai mata 5, da maza 4 da kuma yara mata biyu da kuma wani karamin yaro guda, sai kuma wasi 15 na daban da suka raunana.

A jiya Juma'a ne dai aka sami girgizan kasa a kudanci da tsakiyar kasar ta Mexico inda ta jijjiga gidaje, amma  bayanai sun nuna babu rasa rayuka.

Masana sun bayyana cewa girgizan kasar ta kai karfin maki 7.2 a maauninta.

Wannan dai ba shi ne karon farko ba da ake samun girgiza kasa a Mexico ba, don ko a watan Satumban bara, wata girgizan kasa ta rusa gidaje da yawa da aka yi hasarar rayukan mutane 465.