Mexico: Sakamakon Tarwatsewar Wasu Abubuwa Mutane 24 Sun Rasa Rayukansu
Wasu jerin fashe -fashe a wani wajen sayar da kayayyakin wasan wuta a kasar Mexico sun lashe rayukan mutane akalla 24 tare da jikkata wasu fiye da 30 na daban.
Rahotonni sun bayyana cewa: Wasu jerin fashe-fashe sun auku a wani wajen sayar da kayayyakin wasan wuta a garin Tultepec da ke kasar Mexico, inda suka lashe rayukan mutane 24 tare da jikkata wasu fiye da 30 na daban.
Rahotonnin sun kara da cewa; daga cikin mutanen da suka mutu har da jami'an kwana-kwana 4 da 'yan sanda 2 da suka kai dauki a farkon faruwar fashewar, inda bullar fashewa ta biyu ta ritsa da su lamarin da ya kai ga lashe rayukansu.
Mahukuntan Mexico sun bayyana cewar karfin fashe-fashen sun yi sanadiyyar rushewa wasu gine-gine hudu da suke makobtaka da wajen sayar da kayayyakin wasan wutan.
A watan Fabrairun da ya gabata ma fashewar wani abu a wajen sayar da kayayyakin wasan wuta a jihar Puebla na kasar ta Mexico ya lashe rayukan mutane 14 tare da jikkatan wasu 22 na daban.
