Shirin da ke yin dubu ga ayoyin kur'ani mai tsarki gami da hadisan Ma'aikin Allah tsira da amincin Allah su tabbata a gare shi tare da iyalan gidansa tsarkaka

Jama’a Masu saurare Asslama alekum barkanku da warhaka da kuma sake sauduwa da mu a cikin shirin zababbun aiyuka, shirin da ke yin dubu ga ayoyin kur'ani mai tsarki gami da hadisan Ma'aikin Allah tsira da amincin Allah su tabbata a gare shi tare da iyalan gidansa tsarkaka wadanda suke bayyani dangane da zababbun aiyuka da kuma kyawawen ayyukan musulnci da sune Allah madaukakin sarki ya sanya a matsayin kyakkyawar hanyar  samar da rayuwa mai kyau a zaman duniya da na lahira, a shirin da ya gabata mun fara bayyani kan dabi'ar 'yantuwa daga kangin  Duniya sai Lokacin ya yi mana halinsa, ganin mahimancin maudu'in, Shirin na yau ma zai ci gaba da wannan maudu'i.amma kafin shiga shiri bari mu saurari tanadin da aka yi mana a kan faifai.

************************Musuc***************************

Masu saurare, abinda ake nufi da wannan dabi'a, shi ne Mutum ya kasance mamallaki da kuma shugaban abinda ke cikin Duniya ba wai Mutum ya kasance wanda Duniya ke milki ko kuma Bawan ta, ya dauki abinda ke cikinta daidai gwalgwadon da zai taimaka masa gina gidansa na Lahira, kadda ya kasance babban Burinsa Neman Duniya da tara abin cikinta ta yadda ba zai iya daukan su zuwa ga Lahira ba, duk wanda ya kasance burin sa haka makomasa ba za ta yi kyau ba.A cikin Littafin Kafi, an ruwaito hadisi daga Ma'aikin Allah tsira da amincin Allah su tabbata a gare shi tare da iyalan gidansa tsarkaka ya ce:(Hakika a neman Duniya a kwai cutuwa ga neman Lahira, ku cutu a neman Duniya saboda da neman Lahira domin hakan shi ya fi cancanta)Masu saurare abinda Ma'aikin Allah (s.a,w.a) yake nufi da wannan hadisi shi ne daga cikin Abubuwan dake cutar da neman Duniya shi ne 'yantuwa daga kanginta da kuma kin biyewa jin dadinta wanda zai iya shagaltar da Bawa ya manta da aikin da ya kamata ya yi na gina gidansa na Lahira. Hakika Dabi'ar 'yantuwa daga kangin Duniya na daga cikin dabi'un da suke sanya hasken zukata wajen Sanin Ubangiji, da kuma sanin hakikanin Duniya, kuma wannan shine abinda Hadisin Kudisi da aka ruwaito cikin Littafin Kafi daga Shugabanmu Imam Ja'afaru Sadik (a.s) ya yi ishara da shi, Imam (a.s) ya nakalto hadisin ne daga Munajati na Annabi Musa Kalimu Allah (a.s) yayin da Allah tabarka wa ta'ala yake ce masa:( Ya Musa!Hakika Duniya gidan Azabe ce, ta Azabtar da Adamu  yayin kuskuransa, na kuma sanyata La'antatta, duk abinda ke cikinta La'antacce ne face abinda ya kasance don ni a kayi, Ya Musa! Hakika Bayi Na salihai sun kasance masu gudun Duniya daidai gwalgwadon aikinsu kuma sauren Halittu sun karkata zuwa gare ta daidai gwalgwadon Jahilcinsu, babu wani da zai girmama ta face ya kasance yana kwadayinta , kuma babu wanda zai kaskantar da ita face ya amfana da ita), masu saurare, wannan jumula ta karshe na bayyana mana cewa  dabi'ar 'yantuwa daga kangin Duniya ita ce hanya guda cilo wajen amfana da Duniya da kuma sanya ta a matsayin gidan guziri na kyawawen aiyuka da su ne a gina gidan Lahira, a bangare guda, kaskantar da kai ga kanginta da kuma kwadayin abinda ke cikinta kamar nitso ne a cikin kawalweniya, ba zai amfanar da Mutum da komai ba,Shugabanmu Imam Sadik (a.s) ya ce:(duk ya kwallafawa Zuciyarsa Son Duniya:ya kwallafu da ababe guda uku, na farko damuwar da ba zata warke ba, bukatar da ba zai cimma wa ba, fatan da ba zai samu ba). Masu saurare , wasu Nassosin kuma sun bayyana cewa dabi'antuwa da wannan kyakkyawar dabi'a mabudin cimma duk wani alheri ne, na farkonsa kuma shi ne dandana dadin Imani, domin haka 'yantuwa daga kangin Duniya shi ke bayyaba Imanin da Allah da kuma Ranar Alkiyama. A cikin Littafin Kafi, an ruwaito hadisi daga Shugabanmu Imam Ja'afaru Sadik (a.s) ya ce:(An sanya dukkanin Alheri cikin gida guda, kuma aka sanya mabudinsa gudun Duniya,sannan ya ce:Ma'aikin Allah tsira da amincin Allah su tabbata a gare shi tare da iyalan gidansa tsarkaka ya ce babu wani Mutum da zai dandana dadin Imani a cikin zuciyarsa har sai ya zamanto ba ruwansa da abinda ke cikin Duniya, sannan Imam Sadik (a.s) ya ce Haramun ne ga zukatanku, su dandana dadin Imani har sai sun zamanto masu gudun Duniya).

***********************Musu**********************

Masu saurare barkanmu da sake saduwa, ci gaban shirin zai fara da Aya ta 24 cikin suratu Yunus inda Allah madaukakin sarki ke cewa:(Hakika dai misalin rayuwar duniya kamar ruwa ne da Muka saukar da shi daga Sama, to sai shukokin da suke kan kasa suka cudanya da shi daga abin da Mutane da dabbobi suke ci, har lokacin da kasa ta kawata da shi ta kuma yi ado, masu ita kuma suka sakankance cewa su masu ikon cin amfaninta ne, sai Kaddararmu ta zo mata cikin dare ko rana, sai Muka mayar da ita a girbe kamar dadai ba ta rayu ba a jiya. Kamar haka Muka bayyana ayoyi ga mutanen da suke tunani), Hakika rayuwar Duniya ba madawwama ba ce babu yadda za a yi Mutum ya dauki abinda ya fi bukatunsa yawa  a cikin ta, to mi ya sanya Dan Adam zai kasance mai gwadayin tara abinda ya fi bukatunsa da kuma ba zai iya daukan sa ba zuwa dawamamiyar Rayuwa ta Lahira ba ?Masu saurare hakika hadisai da dama sun shiryar da mu cewa San Duniya shine tushen duk wani sabo domin yana katange Mutum daga Soyayyar Allah madaukakin sarki dake a matsayin mabudin ko wani alheri, kuma hakika Zuciyar Dan Adam ba ta iya daukar sama da soyayya guda kamar yadda Allah madaukakin sarki ke cewa (Allah bai sanya wa wani Mutum Zuciya biyu ba a cikin cikinsa..)suratu Ahzabi Aya ta 4, a cikin littafin Kafi, an ruwaito hadisi daga Shugabanmu Imam Sadik (a.s) ya ce:(idan Mumuni ya kauracewa Duniya zai daukaka kuma ya samu dadin soyayyar Allah, kuma zai kasance Mutanan Duniya sun dauke sa kamar mai  tabuwar hankali, alhalin shi kuma soyayyar Allah ce ta tsudu da jikinsa ba ya shagaltuwa da waninsa)domin haka dabi'antuwa da dabi'ar 'yantuwa daga kangin Duniya da kuma Son ta mabudin rabauta ne da Soyayyar Allah dake bude zuciyar mutum wajen yin da'a da bauta da kuma aikata duk wani alheri da kuma albarkar dake tattare da kyawawen aiyuka da Ilimi da Lafiya gami da tsira daga duk wani tashin hankali da bala'o'i.Imam Ja'afaru Sadik (a.s) ya ce:(duk wanda ya guji Duniya, Allah zai tabbatar da hikima a cikin zuciyarsa ya kuma sanar da harshensa gami da ganinsa aibin Duniya cutuwarta da kuma maganinta, kuma ya fitar da shi daga wannan Duniya cikin aminci zuwa gidan Aminci watau Aljanna) har ila yau masu saurare, daga cikin albarkar dake tattare da wannan dabi'a, rabauta da alherin Duniya kanta da kuma na Lahira, domin shi zai amfana da Ni'imar Duniya ba tare da ya kasance Bawa a gare ta, a cikin Littafin Kafi an ruwaito hadisi daga Shugabanmu Imam Sadik (a.s) na cewa (idan Allah yana son Bawa da alheri sai ya sanya shi mai gudun Duniya a cikin ta, ya kuma sanar da shi ilimin Addini, ya kuma bude masa idanunsa da aibinta watau ita Duniya, kuma duk wanda aka bashi wadannan hakika an bashi alherin Duniya da Lahira) kuma ga wanda ya dabi'antu da wannan kyakkyawar dabi'a zai samu ladan koyi da Ma'aikin Allah Annabi Muhamadu tsira da amincin Allah su tabbata a gare shi tare da iyalan gidansa tsarkaka shugaban masana na hakikanin Duniya, cikin Littafin Kafi, an ruwaito hadisi daga gare shi yana cewa: (Ina ni ina Duniya, misali na da ita kamar wanda yake bisa abun hawa  sai itaciya tayi masa runfa a loacin zabi, ya huta kalkashinta sannan ya fice ya bar ta) daga karshe Masu saurare bari mu rufe shirin da Hadisin Kudisi wanda yake kwadaitar da mu da mu dabi'antu da dabiar 'yantar da kai daga kangin Duniya, A cikin Littafin Amaly na shekh Saduk, an ruwaito hadisi daga Ma'aikin Allah (s.a.w.a) ya ce:( Hakika Allah madaukakin sarki yayi wahayi zuwa ga Duniya na cewa ta wahalar da wanda yake yi mata hidima ta kuma yi hidima ga wanda ya yi watsi da ita ko kuma ya guje ta).

*********************Musuc***************************

Masu Saurare, ganin Lokacin da aka debawa shirin ya kawo karshe, a nan za mu dasa Aya sai kuma a maku na ga ba da yardar Allah za a jimu dauke da wani sabon shiri, a madadin wadanda suka taimakawa shirin har ya kamala, musaman Aminu Ibrahim kiyawa, ni da na shirya kuma na gabatar nike muku fatan Alheri wassalama Alekum warahamatullahi ta'ala wa barkatuhu.