په کابل کې د افغان کډوالو په اړه څلور اړخیزه غونډه کیږي

د طالبانو د حکومت د کډوالو د چارو د وزارت ویاند اعلان وکړ چي د افغان مهاجرینو د ستونزو د هوارولو په موخه به یوه څلور اړخیزه غونډه په کابل کې وشي.

د یاد وزارت ویاند عبدالمطلب حقاني رسنیو ته وویل چي په دې غونډه کې به د تهران، اسلام اباد او د کډوالو په چارو کې د ملګرو ملتونو کمیشنری ګډون وکړي.

هغه زیاته کړه چي تر دې غونډي وروسته به هم دوې نوري ناستې د افغان کډوالو له کوربه هیوادونو سره تر سره شي.

د طالبانو د کډوالو د چارو وزارت ویلي چي له دغو ناستو څخه هدف د کډوالو د ستونزو هوارول دی.

ایران په تېرو څلوېښتو کلونو کې کابو ۵ میلیون افغان کډوالو ته پناه ورکړې او پاکستان کې هم څه د پاسه دوه نیم میلون افغان کډوال اوسیږي.