دافغانستان په شمال کې د داعش پټنځایونه تباه شوي دي
د طالبانو ویاند ذبیح ا... مجاهد ویلي، چې دغه جګړې د مزار شريف ښار په پینځمه، شپږمه او اتمه ناحیه کې شوي دي.
د افغانستان په شمال کې د داعش د شتون د زياتوالي له راپورونو سره هم مهاله، د طالبانو چارواکو د دغې ډلې پر ضد په مزار شريف کې د دريو عملياتو خبر ورکړی.
د طالبانو ویاند ذبیح ا... مجاهد ویلي، چې دغه جګړې د مزار شريف ښار په پینځمه، شپږمه او اتمه ناحیه کې شوي دي.
هغه له نورو جزيياتو پرته د ګڼو داعشیانو د وژلو ادعا کړې او د يوه طالب د ټپي کیدو خبر ېې ورکړی.
ځايي خلکو رسنيو ته ويلي، چې په درې واړو جګړو کې داعش ډلې د طالبانو د ډلې پر وړاندې په ساعتونو جګړه کړې او دواړو لوريو ته تلفات اوښتي دي.
طالبان، معمولا د خپلو جنګیالیو د مرګ ژوبلې د ارقامو په پټولو تورنیږي.
په شاوخوا تېرو دوه اونيو کې داعش ډلې د بلخ ولايت مقام کې د طالبانو پر والي ملا داود مزمل د ځانمرګي برید او په تبیان فرهنګي مرکز کې پر خبریالانو د چاودنې مسوولیت پر غاړه اخیستی.
