لغمان ولایت کښې د وړو ډیمونو د جوړولو کار پیل شوی راپور په ګډه اورو
زمونږ خبریال راپور راکړی لغمان ولایت کې د باراني اوبو زیرمه کولو په موخه د وړو بندونو جوړولو چارې پېل شوې.
چارواکي وایي د دې بندونو د جوړولو چارې به په دوه میاشتو کې بشپړې شي.
د لغمان ولایت کرنې مالدارۍ او اوبو لګولو ریس مولوي محمد حسن محسن وایي د اسلامي امارت مشرتابه فرمان له مخې د لغمان ولایت په پنځه ګونو ولسوالیو دولت شاه، الیشنګ، الینګار، بادپښ او قرغه یي کې د باراني اوبو زیرمه کولو په موخه د وړو بندونو جوړولو چارې پېل شوې.
نوموړي وویل پر دې بندونو چې چارې به یې د دوه میاشتو په موده کې بشپړې شي پنځلس ملیونه افغانۍ لګښت راځي.
مولوي محسن وویل هر بند به د شل زره متر مکعبو اوبو د زیرمه کولو وړتیا ولري.
د لغمان ولایت کرنې ، مالدارۍ او اوبو لګولو ریس وویل د دې بندونو په جوړیدو سره به د سیلابونو له امله د زمکو د تخریب او ویجاړیدو مخه ونیول شي او ورسره به په سیمه کې د اوبو وچې شوې چینې او کاریزونه بیا ځلي تاند شي.
د لغمان اوسیدونکي هم د حکومت ددې اقدام ستاینه کوي او وایي د سیمې اوسیدونکو ته به د کاري زمینې پر برابرولو سربیره د وچکالۍ مخینوی وشي او ورسره به زرګونه جریبه کرنیزه مکه خړوبه شي.
د اسلامي امارت مشرتابه د فرمان له مخې د افغانستان په څلور سوه شل ولسوالیو کې د باراني اوبو زیرمه کولو په موخه واړه بندونه جوړیږي چې لګښت یې د حکومت له بودجې ورکول کیږي.
