ننګرهار کې د قیمتي او نیمه قیمتي ډبرو د پلور مرکز پر فعالیت پېل وکړ راپور دلته واورئ
زمونږ خبریال راپور راکړی چارواکي وایي په دې مرکز کې به کان کیندونکي او سوداګر په قانوني بڼه د قیمتي او نیمه قیمتي ډبرو پلور ترسره کوي.
د قیمتي او نیمه قیمتي ډبرو د پلور دا مرکز د ننګرهار ولایت په مرکز جلال اباد کې پر فعالیت پېل وکړ.
د افغانستان د کانونو او پترولیم وزارت د پلان او پالیسۍ مرستیال «شیخ ضیا الرحمن اریوبي» د دې مرکز د پرانستې پرمهال وویل په دې مرکز کې به د ختیځو ولایتونو ، ننګرهار، کونړ، نورستان او لغمان ولایتونو سوداګر ، کان کیندونکي او سوداګریز شرکتونه په قانوني بڼه خپلې قیمتي او نیمه قیمتي ډبرې لکه نفرایت،کرومایټ او نورې د پلور او نندارې لپاره وړاندې کړي.
شیخ ضیا الرحمن اریوبي وویل د کانونو او پترولیم وزارت په پام کې لرې چې د هیواد په بېلابېلو برخوکې د قیمتي او نیمه قیمتي ډبرو د پلور او نندارې دا ډول مرکزونه جوړ کړي چې پر وینا یې له یوې خوا به د کاني زیرمو د قاچاق مخه ونیول شوي او له بله پلوه به د قیمتي او نیه قیمتي ډبرو پیر او پلور قانوني بڼه غوره کړي.
که څه هم چې په ننګرهار ولایت کې تر دې وړاندې په غیر منظم ډول د قیمتي او نیمه قیمتي ډبرو پیر او پلورتر سره کیده خو دا لومړی ځل دی چې د کانون او پترولیم وزارت له لورې دا ډول یو مرکز پرانستل کیږي.
تیرکال هم په جلال اباد کې د یو شمیر افغان او چینایي پانګه والو له لورې په جلال اباد کې د قیمتي او نیمه قیمتي ډبرو د پلور لپاره د یو مارکیټ د پرانستلو هڅې پېل شو ې وې خو هغه مهال په کابل کې د چینایي پانګه والو پر استوګنځي د وسله وال برید له امله د دې مرکز د فعالیت دپېل چارې هم وځنډیدې.
