اروپايي ټولنې د افغان نجونو د زده کړو پر ملاتړ ټینګار وکړ
په افغانستان کې د اروپايي ټولنې استازولۍ ټینګار کړی چې د افغان نجونو او ښځو له زدهکړو ملاتړ کوي.
دې استازولۍ شنبه د لېندۍ پر ۸ مه د «OrangeTheWorld» نړیوالې ورځې په مناسبت په یوه پیغام کې ویلي چې د ټولو لپاره زده کړې د زیانمنتیا د کمولو کلي ده.
اروپايي ټولنې د زده کړو پر ملاتړ په ټينګار سره ویلي چې راتلونکی باید له هر ډول تاوتریخوالي پاک وي.
د افغانستان لپاره د برېتانیا ځانګړي استازي ریچارډ لینډسي هم ویلي چې د دې هیواد د پرمختګ لپاره باید د ښځو پر زده کړو، کار او بنسټیزو ازادیو لګول شوي بندیزونه ختم شي.
دا ټولنه په داسې حال کې د نجونو پر زده کړو ټینګار کوي چې له څلورو کلونو راهیسې نجونې له شپږم ټولګي پورته له زده کړو بې برخې دي.
طالبانو پر افغانستان تر بیا ځلې واکمنېدو وروسته تر شپږم ټولګي د پورته نجونو پر زده کړو بندیز لګولی او هغوی ښوونځي او پوهنتون ته نه شي تلای.
طالبانو همدا راز په دولتي ادارو او داخلي او نړیوالو سازمانونو کې د ښځو کار منع کړی دی او په ټولنه کې یې هم د هغوی پر حضور پراخ بندیزونه لګولي دي.
بل خوا، ملګرو ملتونو ویلي چې په افغانستان کې پر ښځو تاوتریخوالی په تېرو دوو کلونو کې ۴۰ سلنه زیات شوی دی.
