حکمتیار د لغمان له والی سره وکتل
د حزب اسلامی مشر ګلبدین حکمتیار له پخلاینې وروسته له لومړنی دولتی چارواکی سره وکتل.
د افغان رسنیو د راپور په اساس، د لغمان د ولایتی ادارې له خبرپاڼې سره سم، د لغمان والی عبدالجبار نعیمی د حزب اسلامی له مشر تود هرکلئ وکړ.
عبدالجبار نعیمی د ولسمشر د استازی په توګه د حزب اسلامی له مشر سره په کتنه کښې وویل: د ملی یووالی له حکومت سره د حزب اسلامی د سولې د موافقې په لاسلیک کیدو او د دې پروسې بریا د تلپاتې سولې لپاره د میلیونونو جنګ ځپلو او ځوریدولو افغانانو هیلې ژوندۍ کړې او په دې تمه دی چې په افغانستان کښې جګړه بنده او د جګړې ټولې ښکیلې غاړې د سولې په ټغر راټول شی.
د لغمان والی همداراز وویل: د ملی یووالی حکومت غیږ ټولو هغو دولت ضدو وسلوالو ډلو ته چې غواړی د سولې له روانې پروسې سره یو ځائ شی، پرانیستې ده.
نوموړی د دولت په ټولو وسلوالو مخالفانو غږ وکړ چې د حزب اسلامی د سولې لار تعقیب کړی او له دې پروسې سره پر یوځائ کیدو د هیواد په آبادۍ او ټولو ملی بهیرونو کښې رغنده رسالت ترسره او نور د وینې تویدنې مخه ونیسی.
د لغمان ولایت په مطبوعاتی خبرپاڼه کښې د حکمتیار او نعیمی د خبرو د نیټې او دغه راز د حکمتیار د څرګندونو په اړه څه نه دی ویل شوی. یوازې یادونه شوې چې په دې کتنه کښې د حزب اسلامی امیر ګلبدین حکمتیار هم په ځینو مهمو مسایلو خبرې وکړې او د هر اړخیزې ملګرتیا ډاډ یې څرګند کړ.
