پاکستان د امریکې سفیر احضار کړ

د پاکستان د بهرنیو چارو وزارت د دې هیواد د ایټمي پروګرام په هکله د جوبایډن په وروستیو انتقادي څرګندونو باندې په اعتراض کښې په اسلام آباد کښې د امریکې سفیر وروباله.

له اسلام آباده زمونږ خبریال رپورټ راکړی چې د پاکستان د بهرنیو چارو وزارت پرون په اسلام آباد کښې د امریکې د سفیر په وربللو سره وویل: د پاکستان د ایټمي پروګرام د خطرناک والي په هکله د بایډن څرګندونې د منلو وړ نه دي.

د پاکستان د خارجه وزارت د بیانیې له مخې د دغه هیواد ایټمي پروګرام د ایټمي انرجۍ د نړیوال آژانس په ټولو حفاظتي معیارونو پوره دی.

دغه بیانیه زیاتوي: امریکې باید په هندوستان باندې نیوکه کړې وی چې په دې وروستیو کښې یې له خپل ایټمي اوبتل څخه د بالسټک توغندي آزموینه کړې ده.