په سعودي ایتلاف کې د پاکستان په شرکت نیوکه
د پاکستان د پارلیمان غړو د یمن د خلکو په خلاف د عربستان په خود ساخته پوځي ایتلاف کې د پاکستان په شتون نیوکه وکړه .
د ایرنا خبري اژانس د راپور له مخې د پارلیمان استازو منجمله فرحت الله بابر"،"جاوید عباسی" او میرمن"نسرین جلیل"نن د پارلیمان د استازو پوښتنو ته د ځواب ورکولو لپاره د خارجه وزیر خواجه آصف د رابللو غوښتنه وکړه چې هغه د یمن په خلاف د سعودي خودساخته ایتلاف کې د پاکستان د شرکت په اړه وضاحت ورکړي.
د دغو استازو په قول د پاکستان دولت تر اوسه په دغه ایتلاف کې له شرکت سره د پارلمان د غړو د رضایت د جلبولو او د اعتماد د رایې د لاسته راوړلو لپاره هیڅ اقدام نه دی کړی. او د پاکستان استازي د دغه ایتلاف اهداف مبهم او شکمن ګڼي.
د پاکستان د ملي جرګې غړې شیرین مزاري هم په دا وروستیو کې خبریالانو ته ویلې وو : د دغه هیواد دولت د یمن په خلاف د سعودي په پوځي ایتلاف کې له ورګډیدو مخکې ټاکل شوې وه چې د پارلمان د اعتماد رایې جلب کړي خو تر اوسه یې دغه کار نه دی کړی.
د پاکستان د پوځ پخوانی مشر جنرال راحیل شریف کابو اته میاشتې مخکې د دغه هیواد د پارلیمان له اجازې پرته د یمن په خلاف د عربستان د ځان جوړې پوځي ایتلاف مشري په غاړه واخسته او د پاکستان په داخل کې له ډیرو نیوکو سره مخامخ شو.
