د قطر بایکاټ به جاري ساتو
د قطر د بایکاټونکو څلورو هیوادونو خارجه وزیرانو نن په منامه کښې د خپلې غونډې په بیانیه کښې یوځل بیا پر خپلو تیرو دریځونو او د دغه هیواد د بندیزونو په دوام ټینګار وکړ.
ایسنا د سکای نیوز په حواله لیکلي چې د بحرین د بهرنیو چارو وزیر خالد بن احمد آل خلیفه د ننۍ غونډې په پاې کښې وویل: قطر باید د څلورو هیوادونو د غوښتنو دیارلس واړه بندونه اجرا کړي.
هغه په عین حال کښې څرګنده کړه چې د قطر خلاف روان تدابیر به جاري وي خو که دوحه بدلوني بهیر ته خپل چمتووالی وښئي نو دوي هم خبرواترو ته تیار دي.
همداشان د عربستان خارجه وزیر عادل الجبیر وویل چې قطر باید له تیري ګرو سیاستونو لاس واخلي او د ښه ګاونډیتوب سیاستونه خپل کړي.
د اماراتو د بهرنیو چارو وزیر عبدا... بن زاید آل نهیان هم د دغو هیوادونو د غوښتنو تر پوره کیدو د قطر د بایکاټولو د دوام غوښتونکی شو. او د مصر خارجه وزیر سامح شکري بیا وویل: د دیارلس ګونو غوښتنو په لړ کښې هیڅ ډول مذاکره نه کوو.
دغو څلورو بایکاټونکو هیوادونو قطر د ریاض په مشرۍ عربي بهیر سره په ملګرتیا نه کولو او له ترهګرۍ په ملاتړ تورن کړی دی.
