چین او هندوستان له لانجې وړ سیمې عسکر وباسي
رویټرز خبري اژانس وايي له شخړې وړ سرحدي سیمې د چین او د هندوستان د پوځیانو د شاتګ کولو عملیات نن بشپړیږي.
چین او هندوستان په دوه زره شلم میلادي کال کښې له سختې جګړې وروسته چې د هندوستان د شلو او د چین د څلورو پوځیانو د وژل کیدا سبب شوه د هیمالیا په جنوب کښې په لداخ لوړو او په شخړې وړ سیمې کښې خپل په لسګونو پوځیان دیره کړل.
له لانجې وړ سرحدي سیمې د چین او د هندوستان د عسکرو ایستل د دواړو هیوادونو د لوړرتبه پوځي چارواکو ترمینځ د خبرو اترو له څو پړاونو وروسته ترسره کیږي.
د هندوستان خارجه وزارت وویل د چین او د هندوستان عسکر له تیرې پنجشنبې ورځې راهسې د هیمالیا په لویدیځ کښې له لداخ سیمې په وتلو دي او دغه بهیر به نن ورځ بشپړه شي.
د هندوستان د خارجه وزارت ویاند اریندام باغچي وویل په سیمه کښې ټول موقته مرکزونه چې د چین او د هندوستان د عسکرو لخوا جوړ شوي دي د دغه موافقې د یوې برخې په توګه له مینځه وړل کیږي.
د هندوستان د پوځ یوه جنرال هم چې په لداخ سیمه کښې یې خدمت کړی دی وویل دا یو مثبت ګام دی.
