Adolf Hitler ashinda kwa kishindo katika uchaguzi wa serikali za mitaa Namibia

Mwanasiasa wa Namibia aliyepewa jina la dikteta wa zamani wa Ujerumani, Adolf Hitler, ametangazwa mshindi kwa kishindo katika uchaguzi wa serikali za mitaa, kwa mujibu wa matokeo rasmi yaliyoripotiwa Ijumaa.

Adolf Hitler Uunona, ambaye sasa anapendelea kutambulika kama Adolf Uunona, ameendelea kushikilia kiti chake katika jimbo dogo la kaskazini la Ompundja, mkoa wa Oshana, baada ya kupata kura 1,275, huku mpinzani wake pekee, Isak Akawa, akipata kura 148.

Uunona, ambaye hana uhusiano wowote na kiongozi wa zamani wa Ujerumani ya Nazi, aligombea kwa tiketi ya chama tawala cha South West Africa People’s Organization (SWAPO), huku Akawa akigombea kwa tiketi ya Independent Patriots for Change (IPC).

Uunona amekuwa akishikilia kiti cha baraza katika eneo hilo, ambalo ni koloni la zamani la Kijerumani, tangu mwaka 2004. Mapema wiki hii alitangaza kuwa anapendelea kutambulika rasmi kwa jina la Adolf Uunona kuanzia sasa.

Vyombo vya habari vya ndani vilimnukuu akisema hataki tena kujulikana kwa jina lake la kuzaliwa kwa kuwa tabia na malengo yake ni kinyume kabisa na Kansela wa zamani wa Ujerumani ya Nazi, ambaye anasema hakuwahi kumfahamu kwa undani.