Chombo kipya cha Iran kurushwa anga za juu karibuni hivi

Mjumbe mmoja wa Taasisi ya Utafiti wa Anga za Juu (Astronautics Research Institute) iliyoko chini ya Taasisi ya Utafiti wa Anga (Aerospace Research Institute) ya Wizara ya Sayansi ya Iran ametangaza kuwa, Jamhuri ya Kiislamu karibuni hivi itazindua chombo kipya cha anga za mbali.

Shirika la Habari la Mehr limemnukuu Ramin Kamali akisema hayo katika hafla ya kuadhimisha Wiki ya Anga Duniani na kuongeza kuwa: Hiyo ni hatua muhimu ya kuelekea kujitegemea kikamilifu taifa la Iran katika teknolojia hiyo.

Hafla hiyo, iliyofanyika chini ya kaulimbiu kuu ya "Mapinduzi ya Vyombo vya Kubeba Satelaiti," imehudhuriwa na Sattar Hashemi, Waziri wa Teknolojia ya Habari na Mawasiliano, Hassan Salarieh, Mkuu wa Shirika la Anga la Iran pamoja na wataalamu na wasomi mbalimbali katika teknolojia hiyo.

Kamali amesema kuwa, roketi za utafiti wa anga za juu (sounding rockets) ni moja ya zana muhimu za kimkakati za utafiti katika mfumo wa kimataifa wa teknolojia za anga.

Amebainisha kuwa, roketi hizo hutumika kama jukwaa la kawaida linalofanya kazi vizuri na la kuaminika kwa ajili ya kufanya majaribio ya anga duniani kote; ni zana zenye gharama nafuu zinazofanya kazi kama maabara za anga zinazohamishika.

Amesema: Matokeo ya utafiti unaofanywa kwa kutumia roketi hizo yana jukumu muhimu katika utekelezaji wa kivitendo wa mambo mbalimbali ya kimkakati ya ngazi za juu na katika sekta kama vile afya na tiba, usalama, kuhifadhi mazingira na sekta nyingine za viwandani.

Mtafiti huyo kutoka Taasisi ya Utafiti wa Anga ya Iran ameelezea matumizi mapana ya vifaa vya uchunguzi na kusisitiza kwamba, roketi zenye sauti ya meli hazitumiki tu kama maabara ya kusoma matukio ya mikrograviti yanayojumuisha biolojia, afya, tabia za wanyama na sayansi ya vifaa, lakini pia hutumika kukamilisha kazi nyingine za kimkakati.