Wanajeshi wa Kizayuni washambulia maeneo mbalimbali katika Ukingo wa Magharibi

Wanajeshi wa utawala wa Kizayuni wa Israel kwa mara nyingine tena wameshambulia maeneo mbalimbali ya Ukingo wa Magharibi wa Mto Jordan. Wapalestina kadhaa wameuawa shahidi na wengine kujeruhiwa katika hujuma hiyo ya Wazayuni.

Vilevile mtoto na kijana wa Kipalestina wameuawa shahidi na wengine kadhaa kujeruhiwa katika shambulio la leo la jeshi  la Israel dhidi ya vijiji na vitongoji vya Ukingo wa Magharibi wa Mto Jordan kusini mwa mji wa Jenin. 

Wakati huo huo, takwimu zilizotangazwa na Klabu ya Mateka wa Kipalestina zinasema kuwa, wanajeshi wa utawala wa Kizayuni wa Israel usiku wa kuamkia leo Jumatatu waliwatia nguvuni Wapalestina 12 huko Tul Karam, al Khalil, Nablus, Jenin na mashariki mwa Qalqiliya kaskazini mwa Ukingo wa Magharibi wa Mto Jordan. Wanajeshi wa Israel pia wamebomoa nyumba za raia hao wa Palestina baada ya kuwapiga na kuwatesa. 

Katika upande mwingine, vijana wa Kipalestina wamekabiliana na wanajeshi wa Israel katika kitongoji cha Taqu kaskazini mwa al Khalil.