Wanaharakati Brazili wataka kukomeshwa vita vya Gaza, uhusiano na Israel

Vyama vya mrengo wa kushoto, wanaharakati wa haki za binadamu, na waungaji mkono Palestina nchini Brazil wameandamana na kutoa mwito wa kukomeshwa vita vya Gaza na kukata uhusiano na utawala ghasibu wa Israel.

Ripoti zinasema kuwa, waandamanaji hao walikusanyika nje ya balozi za Marekani na balozi ndogo katika miji mikubwa nchini Brazili, ikiwa ni pamoja na Rio de Janeiro, Recife, na Brasília, kupinga vita vinavyoendelea vya Israel dhidi ya Gaza na uhusiano wa Brazil na Israel.

Kufuatia vuguvugu la chuki dhidi ya Israel lililochochewa kutoka vyuo vikuu vya Marekani baada ya utawala wa Israel kuanzisha vita vya mauaji ya halaiki huko Gaza mwezi Oktoba 2023, maandamano hayo yanaenea duniani kote.

Nchini Brazil, waandamanaji hao walitaka kusitishwa mara moja kwa mzozo wa Gaza, kukatishwa kikamilifu uhusiano wa kidiplomasia na kibiashara wa Brazil na Israel, kufutwa kwa ushuru wa biashara wa zama za Trump, na kuongeza shinikizo la kimataifa kwa utawala wa Israel.

Waandamanaji walitoa wito wa kusitishwa mara moja kwa vita huko Gaza na kukata uhusiano wa Brazil na Israel. Maandamano hayo yalifikia kilele kwa sanamu za Donald Trump na Benjamin Netanyahu kuchomwa moto kama ishara ya kukataa sera za Marekani na Israel. Wakati mzozo wa kibinadamu huko Gaza unazidi kuwa mbaya, maandamano hayo yanaonyesha kuongezeka kwa mshikamano wa kimataifa na Wapalestina.