Wanaharakati 87 waliotekwa na vikosi vya Israel waanzisha mgomo wa njaa

Angalau wanaharakati 87 waliotekwa nyara na vikosi vya Israel wakati wa uvamizi dhidi ya msafara wa misaada ya kibinadamu kuelekea Gaza, wameanzisha mgomo wa njaa, waandaaji wa safari hiyo walitangaza Jumatano.

Msafara wa Kimataifa wa Global Sumud Flotilla umesema kuwa waliozuiliwa wamekataa kula chakula “kama njia ya kupinga utekaji wao haramu, na kwa mshikamano na zaidi ya Wapalestina 9,500 wanaoshikiliwa katika jela za Israel.”

Mvutano huu umepamba moto baada ya wanajeshi wa Israel kuishambulia meli ya Lina al-Nabulsi, ambayo ilikuwa meli ya mwisho ya msafara huo, katika maji ya kimataifa Jumanne usiku, na kuwateka kwa nguvu watu sita waliokuwemo ndani.

Israel ilianza kuuzingira msafara huo tangu Jumatatu, takriban maili 70 za baharini magharibi mwa Cyprus, licha ya msafara huo kuwa na lengo safi la kibinadamu. Msafara huo uliondoka Marmaris, Uturuki, Alhamisi iliyopita, wakiwa na washiriki zaidi ya 420 waliodhamiria kuvunja mzingiro haramu wa Israel dhidi ya Gaza na kupeleka misaada ya dharura.

Miongoni mwa waliotekwa ni raia tisa wa Indonesia, jambo lililothibitishwa na Wizara ya Mambo ya Nje ya Indonesia. Jakarta imedai kuachiliwa huru mara moja kwa watu hao na meli zao, na kuahidi kutumia “kila njia ya kidiplomasia na hatua za kibalozi” zilizopo.

Waliozuiliwa pia wanajumuisha raia 15 wa Ireland, akiwemo Dkt. Margaret Connolly, dada yake Rais wa Ireland, Catherine Connolly.

Mawaziri wa mambo ya nje kutoka nchi kumi—Uturuki, Bangladesh, Brazil, Indonesia, Uhispania, Colombia, Libya, Maldives, Pakistan, na Jordan—wametoa tamko la pamoja wakilaani shambulio la Israel dhidi ya msafara huo wa raia. “Mashambulizi haya dhidi ya vyombo vya majini na kuwazuilia wanaharakati kiholela ni ukiukaji wa wazi wa sheria za kimataifa na sheria za kibinadamu za kimataifa,” walisema mawaziri hao.

Poland nayo imeeleza “wasiwasi mkubwa” na kudai ufafanuzi wa dharura kutoka Israel.

Rais wa Korea Kusini, Lee Jae-Myung, naye amelaani vikali kitendo cha Israel kuwateka nyara raia wa nchi yake waliokuwa kwenye msafara huo wa meli za misaada, akikiita kitendo hicho kuwa “cha kinyama” na kupendekeza kuwa Seoul inapaswa kumkamata Waziri Mkuu wa Israel, Benjamin Netanyahu, iwapo ataingia katika ardhi ya Korea Kusini.

Katika mkutano wa baraza la mawaziri Jumatano, Rais Lee alikosoa kitendo cha Israel kuuzingira msafara huo wa raia katika maji ya kimataifa kuwa ni “cha kupita kiasi” na kisichoweza kutetewa kisheria.

Rais wa Korea Kusini ameendelea kuhoji hivi: “Ni msingi gani wa kisheria unaoipa Israel mamlaka ya kuteka au kuzamisha meli, zikiwemo zile zilizobeba raia wetu waliokuwa wakijitolea kwa ajili ya Gaza? Je, uvamizi na ukaliaji wa Gaza na Israel wenyewe si haramu chini ya sheria za kimataifa?”

Lee amesema Korea Kusini haipaswi kupuuza hati za kukamatwa kwa Netanyahu zilizotolewa na Mahakama ya Kimataifa ya Jinai (ICC), akibainisha kuwa mataifa kadhaa ya Ulaya tayari yamesema nia yao ya kumkamata ikiwa ataingia katika mamlaka yao. “Tunapaswa pia kuzingatia hili,” alisisitiza.

Shambulio hili la karibuni linafuatia mashambulizi mengi ya Israel dhidi ya misafara ya meli za misaada za Global Sumud Flotilla, ikiwa ni pamoja na uvamizi wa Aprili 26 karibu na Ugiriki ambapo wanaharakati baadaye waliripoti vitendo vya unyanyasaji wa kijinsia, mashambulizi ya kimwili, na matibabu ya kudhalilisha wakiwa chini ya ulinzi wa Israel.

Operesheni kama hiyo ya uharamia mwezi Oktoba mwaka jana ilishuhudia jeshi katili la Israel likizingira takriban boti 40, na kuwazuilia zaidi ya wanaharakati 450, wakiwemo mjukuu wa Nelson Mandela, mwanaharakati wa Uswidi Greta Thunberg, na mbunge wa Bunge la Ulaya Rima Hassan. Wengi baadaye walielezea  namna walivyoteswa kimwili na kisaikolojia kabla ya kuachiliwa.