Sojojin Nijar Da Chadi Sun Kashe 'Yan Boko Haram Sama Da 100

Ma'aikatar tsaron kasar Nijar ta bayyana cewar sojojin kasar da na kasar Chadi sun sami nasarar hallaka sama da 'yan kungiyar Boko Haram 100 a wasu hare-haren da suka kai musu a watannin baya-bayan nan.

Kafar watsa labaran Africa Times ta bayyana cewar a cikin wata sanarwa da ma'aikatar tsaron kasar  ta Nijar ta fitar ta bayyana cewar a wasu hare-hare na hadin gwiwa da sojojin kasashen Nijar da Chadin suka kai wa 'yan Boko Haram din a yankuna daban-daban, sun sami nasarar hallaka 'yan Boko Haram din su 123.

Har ila yau sanarwar wacce kakakin ma'aikatar tsaron Nijar din Moustapha Ledru ya sanya wa hannu ya ce a yayin wadannan hare-hare sojojin kasashen biyu su 14 sun rasa rayukansu kana wasu 39 kuma sun sami raunuka.