Harin Bam Ya Hallaka Mutane 6 A Somaliya

Akalla Mutane 6 ne suka rasa rayukansu yayin da wasu 10 da daban suka jikkata sanadiyar tarwatsewar wata Mota shake da bama-bamai a Magadushu babban birnin kasar Somaliya

Kamfanin dillancin Labarai na kasar Iran ya nakalto wani jami'in Gwamnatin Somaliya na cewa akalla Mutane 6 ne suka rasa rayukansu yayin da wasu 10 da daban suka jikkata sanadiyar tarwatsewar wata Mota shake da bama-bamai a Magadushu babban birnin kasar Somaliya.

Jami'in ya kara da cewa Harin ya auku ne a safiyar Jiya Litinin a wata Babbar hanya mai cinkoson jama'a dake tsakiyar birnin Magadushu.

Ya zuwa yanzu babu wata kungiya ko wani gungu da ya dauki alhakin kai harin, saidai a 'yan shekarun baya-bayan nan kungiyar ta'addancin ta Ashabab mai alaka kut da kut da kungiyar Alka'ida na daukan yaunin duk tashin bama-bamai da hare-haren ta'addanci da aka kaiwa kasar Somaliya da kasashen dake makwabtaka  da ita.