Somaliya: Mutane 11 Sun Mutu Saboda Tarwatsewar Mota Mai Bama-bamai.

Motar da aka makare da maba-bamai ta tarwatse ne a kusa da wani gidan cin abinci a garin Kismayo da ke kudancin kasar ta Somaliya a jiya laraba.

Baya ga wadanda su ka rasa rayukansu, wasu da dama sun jikkata kamar yadda majiyar tsaro ta ambata.

Kawo ya zuwa yanzu dai babu wata kungiya da ta dauki alhakin kai harin, sai dai jami'an tsaron kasar suna nuna danyatsan tuhuma ga kungiyar al-shabab mai alaka da alka'ida.

A ranar talatar da ta gabata ma dai wata motar mai makare da bama-bamai ta tashi a wannan garin na Kisimayo tare da jikkata mutane 10.

Somaliya tana fama da rashin tsaro saboda hare-haren da kungiyar ta al-shabab ta ke kaiwa.