Nakiya Ta Kashe Sojojin Burkina Faso Uku

Rahotanni daga Burkina faso na cewa sojojin kasar uku ne suka rasa rayukansu a yayin da motarsu ta taka nakiya a lardin Turonata dake karamar hukumar Tongomayel dake yankin Sahel a arewacin Wagadugu babban birnin kasar.

Sojojin da suka gamu da ajalinsu a wannan lamarin sun hada da maza biyu da kuma macce guda, a cewar kamfanin dilancin labaren Burkina faso na (AIB).

Yankin arewacin Burkina Faso dai ya jima yana fama da hare-haren mayakan jihadi kan jami'an tsaro da kuma fararen hula.

Lamarin dai na zuwa ne kwanaki hudu bayan mumunan harin ta'addancin da ya yi sanadin mutuwar mutane 18 a wani gidan sayar da abunci na Turkawa dake tsakiyar birnin Wagadugu.