Najeriya : Mutum 15 Sun Mutu A Hare-haren Kunar Bakin Wake
Rahotanni daga Najeriya na cewa mutane a kalla 15 ne suka rasa rayukansu a wasu jerin hare haren kunar bakin wake a wani sansanin 'yan gudun hijira dake kauyen Mashahari na birnin Maiduguri a arewa maso gabashin kasar.
An dai kai harin ne da misalin karfe 11 agogon GMT a safiyar yau a yayin rabon abunci a sansanin dake kauyen Mashalari dake a karamar hukumar Konduga na Maiduguri
Bayanai sun ce an samu fashewar abubuwa biyu a kauyen inda rayukan mutane 15 suka salwanta kana wasu 43 na daban suka jikkata, kana kuma wata mata ta tarwatsa kan ta a daura da wurin aman ba tare da jikkata kowa ba.
Kawo yanzu dai babu wata kungiyar data dau alhakin kai harin, saidai sau tarin yawa akan danganta ireiren wadanan ayyukan ta'addi ga kungiyar nan da aka fi sani da Boko haram.
Wannan dai ba shi ne karob farko ba da ake fuskantar hari a wannan yankin, inda ko a tsakiyar watan Agusta da ya gabata wasu jerin hare haren kunar bakin wake uku suka yi ajalin mutane 28 da raunana wasu sama da 80.
