Libya: An Yi Zanga-zangar Nuna Kin Amincewa Da Harin Garin Darnah

Mazauna garin Darnah a arewa maso gabacin kasar ta Libya sun yi Zanga-zangar ne ta yin Allah wadai da harin da aka kai wa garinsu tare da kashe fararen hula.

Bugu da kari masu Zanga-zangar sun yi tir da killace garin nasu da sojojin janar Halifa Haftar suka yi.

A daya gefen ma'aikatar harkokin wajen kasar Italiya ta bukaci da a gudanar da bincike akan laifukan yakin da aka tafka a cikin gari bayan gano gawawwakin mutane 36.

Tun bayan da kungiyar yarjejeniyar tsaro ta "Nato" ta kifar da gwamnatin Kaddafi a 2011, kasar Libya ta fada cikin rashin tsaro.

Kungiyoyin 'yan ta'adda  da suka hada da Dae'sh sun kafa iko da wasu garuruwa na kasar ta Libya da suka hada da Darnah.