Zimbabwe : Juyin Mulki Ne Aka Mini_ Mugabe

Tsohon shugaban kasar Zimbabwe, Robert Mugabe, ya danganta cilasta mashi yin murabus a matsayin juyin mulki.

Mista Mugabe ya bayyna hakan ne yau Alhamis a hira farko da yayi da manema labarai tun bayan saukarsa daga mulki.

Mugabe ya ce na fada cewa ''juyin mulki ne, amma wasu sun ki amunce cewa juyin mulki ne'' kamar yadda ya fada a hirar da gidan talabijin na Afrika ta Kudu SABC, inda aka nuno yana magana a gajiye.

A watan Nowamba da ya gabata ne jam'iyyar Zanu PF da sojojin kasar ta Zimbabwe suka cilasta ma Robert Mugabe da yin murabus.

Robert Mugabe dan shekaru 94 ya dai ya shafe shekaru 37 yana mulki a Zimbabwe, kafin jam'iyyarsa ta ZANU PF ta cilasta masa da yin murabus.