Afirka Ta Kudu: Winnie Mandela Tsohuwar Matar Marigayi Nelson Mandela Ta Rasu

Rahotanni daga kasar Afirka ta kudu sun ce Winnie Madikizela Mandela tsohuwar matar marigayi Nelson Mandela ta rasu.

Rahotannin sun ce Winnie Madikizela Mandela ta rasu ne bayan fama da wata doguwar jinya ta rasu tana da shekaru 81 da haihuwa.

Winnie ta kasance a matsayin mata ga tsohon shugaban kasar Afirka ta kudu kuma jagoran fada da wariyar launin fata a kasar Marigayi Nelson Mandela, wadda ta taka gagarumar rawa wajen kalubalantar mahukuntan lokaci masu gallaza wa babaken fata.

Mandela ya kwashe shekaru 27 yana a gidan kaso yayin da ita kuma ta ci gaba da bin tafarkinsa na gwagwarmaya har zuwa lokacin da ya fito a shekara ta 1990. Sun rabu a shekara ta 1996, amma duk da haka ta ci gaba da mara masa baya da kuam kasancewa tare da shi har zuwa karshen rayuwarsa a shekara ta 2013.