Kamaru : An Ceto 'Yan Kasashen Waje 12 Da Ake Garkuwa Da Su

Hukumomin Kamaru sun ce sojojin kasar sunyi nasara ceto wasu 'yan kasashen waje 12 da akayi garkuwa dasu a yankin masu magana da turancin Ingilishi.

Mutanen da aka ceton wadanda galibi 'yan yawan bude ido ne sun hada da 'yan asalin kasashen Italiya da kuma na Swiss a cewar wata sanarwar gwamnatin kasar.

An dai ceto mutanen ne a ranar Litini, saidai babu karin haske akan lokacin da akayi garkuwa dasu, saidai sanarwar ta ce wani gungun 'yan ta'adda ne sukayi garkuwa da mutanen a yankin Mungo-Ndor.

Ko baya ga hakan sanarwar ta ce an kuma kubutar da wasu kansilolin kasar ta Kamaru su guda shida a wani samamen soji a yankin arewa maso yammacin kasar.