Afrika Ta Kudu : An Kai Harin Wuka Kan Wani Masallacin 'Yan Shi'a

Wasu mahara dauke wukake sun farma wa wani masallacin 'yan shi'a a yankin KwaZulu-Natal dake Afrika ta Kudu, inda suka kashe limanim masallacin tare da raunana mutum biyu.

Harin na jiya Alhamis, wanda ba'a saba ganin irinsa ba a yankin an dai kai shi ne a masallacin Imam Hussain.  

Saidai wasu bayanai na cewa maharan wadanda bisa ga dukkan alamu 'yan asalin kasar Masar ne, sun isa masallacin da bindigogi, amma suka yi amfani da wukake, kafin daga bisani su arce.

Masallacin dai na karbar musulmin yankin Durban dake arewa maso gabashin kasar ta Afrika ta Kudu.

Har kawo yanzu kuma babu wata kungiya data dau alhakin kai harin.

Tuni dai 'yan majalisar dokokin Afrika ta Kudu suka yi tir da harin, wanda shi ne irinsa na farko a kasar.