Allah Yayi Wa Jakadan Nijeriya A Qatar Dr. Abdullah Bawa Wase Rasuwa

Rahotanni daga Nijeriya sun bayyana cewar Allah ya yi wa jakadan kasar a kasar Qatar Malam Bawa Abdullahi Wase rasuwa bayan rashin lafiyar da yayi fama da ita.

A wata sanarwa da Ma'aikatar harkokin wajen Nijeriyan ta fitar ta ce marigayi Dakta Wase ya rasu ne da yammacin jiya Juma'a a birnin Doha, babban birnin kasar ta Qatar bayan rashin lafiyan da yayi fama da shi.

Tashar talabijin din Channels TV ta Nigeriyan ta ce yayin da yake magana kan rasuwar Ambasada Wase din, Ministan harkokin wajen Nigeria, Geoffrey Onyeama, ya ce yayi matukar kaduwa da jin labarin rasuwar yana mai addu'ar  Allah ya ba wa iyalin mamacin da sauran 'yan Nijeriya baki daya  hakurin wannan babban rashi da aka yi.

Shi dai Dakta Bawa Abdullah Wase dan jihar Filato ne kuma kafin nada shi a matsayin jakadan Nijeriya a Doha din da shugaban Nijeriya, Muhammadu Buhari ya yi ya kasance mai sharhi  kan lamurran da suka shafi tsaro saboda kwarewar da yake da ita a wannan bangaren.

Allah Ya jikansa ya sa ya huta.