Jagora Ya Ziyarci Hubbaren Imam Khomenei (RA) Farkon Ranakun Fajr

Jagoran juyin juya halin muslunci a Iran Ayatollah Sayyid Ali Khamenei ya ziyarci hubbaren marigayi Imam Khomeni (RA) da wasu daga cikin shahidan juyin Islama, a daidai lokacin da ake fara bukukuwan zagayowar ranakun fajr na juyin Islama a kasar.

Ayatollah Sayyid Ali Khamenei a yayin ziyarar tasa, ya ziyarci kabrukan wasu daga cikin wadanda suka bayar da gudunmawa wajen kafa jamhuriyar muslunci,inda ya fara da kabarin Ayatollah Hashemi Rafsanjani, wanda ya rasua  'yan makonnin da suka gabata.

Bayan na kuma ya ziyarci kabrukan Shahid Beheshti, tsohon alkalin alkalan kasar da kuma Rajae tsohon shugaban kasar gami da Bahonar tsohon firayi ministan kasar, wadanda dukkaninsu suka suka yi shahada wajen bayar da gudunmawa ga juyin Islama.

Haka nan kuma jagoran ya ziyarci kabrukan wasu daga cikin wadanda suka yi shahada a wurin akre wurare masu tsarki na musulmi, da kuma wadanda suka rasa rayukansu daga cikin 'yan kwana-kwana a cikin makon da ya gabata, a lokacin kashe gobara a ginin Palsco a birnin Tehran.