Rauhani:Da Taimakon Iran, Al'ummar Yankin Sun Tsira Daga Sharin 'Yan Ta'adda

Shugaban Jamhoriyar musulinci ta Iran Dakta Hasan Rauhani ya bayyana cewa shekarar bana shekara ce ta cin nasarar al'ummar Iran a kan 'yan ta'adda da kuma nasarori ga al'ummar yankin.

A yayin da yake jawabi a gaban milyoyin mutane da suke taru domin nuna murnar su kan zagayowar ranar cin nasarar juyin juya halin musulinci na nan kasar Iran koro na 39, shugaba Rauhani ya tabbatar da cewa, taimakon da al'ummar Iran suka yi wa al'ummar kasashen Iraki, da Siriya ya bayar da sakamako mai kyau, kuma al'ummar yankin sun tsira daga sharin 'yan ta'adda.

Yayin da yake ishara kan kokarin makiya na rarraba kasashen yankin, shugaba Rauhani ya ce basirar al'ummar Iraki da kuma taimakon kasashen yankin ya kara tabbatar da hadin kai gami da soyayyar juna tsakanin al'ummar kasar da kasashen yankin.

Yayin da ya koma kan al'ummar kasar Labnon, Shugaba Rauhani ya ce farkawar al'ummar kasar da kuma taimakon kasashe aminai ya karya lagon makircin Amurka da Haramtacciyar kasar Isra'ila a game da kasar.

Har ila yau shugaban jamhoriyar musulinci ta Iran ya bayyana irin nasarorin da kasar sa ta samu ta hanyar tattaunawa, inda ya kara da cewa magance matsalar yankin na siyasa ne kuma wajibi a kasashen yankin su hada kai domin tabbatar da tsaro da sulhu a yankin su.

A yayin da ya koma kan yarjejjeniyar nukiliyar zaman lafiya da kasar Iran din ta cimma da manyan kasashe 5 gami da kasar Jamus, Shugaba Rauhani, ya bayyana cewa magaban Amurka sun yi ta kokarin wargaza wannan yarjejjeniya amma ba su ci nasara ba, kuma idan suna so su fice daga wannan yarjejjeniya, ba da jimawa za ta ga illar ficewar.

Yayin da ya koma kan makircin Amurka game da birnin Qudus, Shugaba Rauhani ya bayyana cewa Duniya ta tsaya gaban Amurka game da wannan mataki, ba wai kawai kasashen musulmi ba, in ba da wasu kasashen kadan, dukkanin kasashen Duniya sun nuna rashin amincewarsu da matakin da shugaban Amurka ya dauka na ayyana birnin Qudus a matsayin hedkwatar haramtacciyar kasar Isra'ila a zauran majalisar dinkin duniya.