Iran Ba Ta Fatan Wani Sabon Rikici A Yankin_Rohani
Shugaban Jamhuriya Musulinci ta Iran, Hassan Rohani, ya bayyana cewa kasarsa bata fatan barkewar wani sabon rikici a gabas ta tsakiya .
Shugaba Rohani na bayyana hakan ne a wata hira ta wayar tarho da shugabar gwamnatin Jamus, Angela Merkel, a jiya Alhamis, inda yake cewa Iran har kulun na neman kwantar da hankali a yankin, ta hanyar karfafa tsaro da zaman lafiya.
Shafin fadar shugaban kasar ta Iran, ya rawaito shugaban na cewa, shiga yakin da Iran ta yi a kasashen Siriya da Iraki, don kawar da ayyukan kungiyar 'yan ta'adda ta Da'esh ne, kuma shi ne sakamakon zaman lafiya da aka fara samu a Siriya da kuma wanda aka samu a Iraki, wanda kuma hakan babban ci gaba ne ga yankin da duniya har ma da Turai.
Duk da cewa shugaban kasar bai dauko batun hare haren da sojojin yahudawan mamaya na Is'ra'ila suka kai a Siriya ba, da kuma martanin da Siriya ta mayar, amma a nasa bangare shugaban kwamitin harkokin kasashen ketare na majalisar dokokin Iran, Allaeddine Borujerdi, tir ya yi da hare haren na Isra'ila.
M. Borujerdi, wanda ke bayyana hakan ga manema labarai a ofishin jakadancin Iran na birnin Lisbonne ya kara da cewa, duk martanin da Siriya ta mayar yana daga cikin kare kanta.
Haka zalika ya kara da cewa, Isra'ila ta shiga cikin wani ''wasa mai hadari'', wanda manufar kai harin da Amurka ta goyi baya, shi ne karkata hankalin duniya kan halayen shugaba Trump kan janye Amurka daga yarjejeniyar nukiliyar da manyan kasashen duniya suka cimma wa da Iran.
