Sojojin Siriya Sun 'Yanto Garin Kunaitara

Sojoji da Dakarun sa kai na Siriya sun samu nasarar 'yanto garin kunaitara daga mamayar kungiyoyin 'yan ta'adda a wannan alhamis.

Kamfanin dillancin labaran Irna ya nakalto majiyar tsaron kasar Siriya na cewa a wannan alhamis dakarun tsaron kasar sun samu nasarar 'yanto garin kunaitara daga mamayar kungiyoyin 'yan ta'adda, sannan kuma sun killace 'yan ta'adda a kanyuka shida na jihohin Dar'a da Kunaitara a kudu da kuma kudu maso yammacin kasar .

Har ila yau Dakarun tsaron Siriya sun daga tutar kasar a mashigar garin Kunaitara dake kan iyaka da Haramtacciyar kasar Isra'ila.

Duk da cewa jihar Kunaitara, karamar jiha ce a kasar, to amma saboda wani bangare na tudan gollan na karkashinta kuma tana iyaka da HKI, ya sanya ta kasance daga cikin jihohi masu mahimanci na kasar.

A bangare guda kamfanin dillancin labaran Sana na kasar ta Siriya ya habarta cewa a mashigar garin na Kunaitara, dakarun tsaron na siriya sun gano wani wuri na kula da marassa lafiya cikin sahara, inda a cikinsa kuma aka gano magunguna masu yawa kirar haramtacciyar kasar Isra'ila.