An Kai Hare Haren Bam A Yayin Zaben Afganistan

Rahotanni daga Afganistan na cewa an samu tashin bama-bamai a sassan daban na Kabul babban birnin kasar a daidai lokacinda al'ummar kasar suka fara kada kuri'a a zaben 'yan majalsuar dokoki a yau Asabar.

Bayanai sun ce an samu hasara rayukan akalla mutum uku da kuma jikatar wasu kimanin 30 a hare haren da aka kai kusa da runfunan zabe.

Ma'aikatar cikin gidan kasar ta ce makiya sun kai kusan hare hare 15 a fadin kasar, kuma dukkansu harin bam ne kirar gargajiya dana makaman Roka.

Wasu rahotanni na daban sun ce an kara lokacin bude runfunan zabe a wasu mazabun, yayin aka jinkirta zaben a wasu sassa kamar Kandahar har zuwa gobe Lahadi.