Sojojin Britaniya 5 Suka Halaka A Sansaninsu A Siriya

Wasu majiyoyin labarai a kasar Siriya sun bayyana cewa sojojin kasar Britania 5 ne suka halaka a lokacinda yan ta'adda na kungiyar Daesh wadanda har yanzun suke iko da yankin Dair-Zur daga gabacin kasar suka cilla makamai masu linzami a kansu.

Jaridar al-watan ta kasar Siriya ta ruwaito labarin cewa sojojin kasar Britania da dama ne suka halaka a yayinda wasu kuma suka ji rauni a harin rokan da mayakan kungiyar Daesh suka cilla daga yankunan da suke iko da su a gabcin kasar, kan sansanin sojojin Britania a garin Abu Kamal na yankin Dair-Zur.

Sojojin Britania dai sun tabbatar da wannan labarin amma basu yi karin bayani dangane da asarorin rayuka da suka yi ba. Sojojin Britania dai suna karkashin kawancen sojojin Amurka masu yaki da abinda suka kira yan ta'adda ta Daesh a kasar ta Siriya tun shekara ta 2014.

Sojojin kasashen biyu sun shiga kasar Siriya ne ba tare da izinin gwamnatin kasar ba.