Koriya Ta Arewa Ta Harba Makamai Masu Linzami Guda 4

Koriya ta arewa ta harba wasu makamai masu linzami guda hudu a wannan Litinin, wanda uku daga cikinsu suka fada wani yankin kasar Japon.

Fira ministan kasar Japon Shinzo Abe ya sanar da cewa Koriya ta Arewa ta harba makamai masu linzami inda uku daga cikinsu suka fada a yankin hadar-hadar kasuwanci na Zee a kasar ta japon.

Tunda farko dai rundunar sojan kasar Koriya ta Kudu ta bayyana cewa, da sanyin safiyar wannan rana, Koriya ta Arewa ta harba wani abu da har yanzu ba'a san ko shi menene ba.

Wannan dai ba shi ne karon farko ba da koriya ta Arewa ke harba irin wannan makamin ba, inda ko a ranar 12 ga watan Fabrairun bana, ta yi nasarar harba wani makami mai linzami mai cin matsakaici gami da dogon zango, duk da takunkumin da Amurka dama MDD ke saka mata kan irin wannan gwajin.