په افغانستان د پاکستان د بریدونو د وژلې شمیر زیات شوی
زمونږ خبریال وايي د افغانستان په کونړ او خوست ولایتونو باندې د پاکستان د تیرې جمعې شپې د هوايي بریدونو او د توپونو د ډزو تلفات پینځه څلویښتو (۴۵) ته ورزیات شوي .
د افغانستان د طالبانو یوه چارواکي چې غوښتل نوم یې ونه ښودل شي وویل په خوست ولایت باندې د پاکستان د پوځ د تیرې جمعې شپې په هوايي حملې کښې کابو څلویښت (۴۰) ملکي وګړي وژل شوي او شل نور ژوبل شوي دي .
هغه وویل په دغه حملې کښې نهویشت وژل شوي کسان د یوې کورنۍ او نور وژل شوي کسان هم د دریو نورو کورنیو غړي دي چې څو کاله مخکې یې د پاکستان له وزیرستان سیمې څخه افغانستان ته مهاجرت کړی و .
د طالبانو د اطلاعاتو او د کلتور ادارې سرپرست نجیب الله حنیف هم وویل چې د پاکستان ځواکونو له تیرو دریو ورځو راهسې په کونړ ولایت کښې په مرواره ، شلتون او نارۍ سیمو باندې د توپونو ډزې کړي دي .
نجیب الله وویل د افغانستان په سرحدي سیمو باندې د پاکستان د تیرې جمعې شپې په بریدونو کښې د ماشومانو په شمول پینځه ملکي وګړي وژل شوي او یوبل ژوبل شوی هم دی .
پاکستان ادعا کوي چې په شمالي وزیرستان سیمه کښې په حکومتي عسکرو باندې د پاکستان د طالبانو ډلې وروستۍ حمله چې اته (۸) حکومتي پوځيان پکښې وژل شوي وو د افغانستان له خاورې شوي وه .
د طالبانو خارجه وزارت وویل چې د هیواد په بیلابیلو سیمو باندې د پاکستان د حملو په ارتباط یې په کابل کښې د اسلام اباد سفیر احضار کړی .
پاکستان هم په اسلام اباد کښې د طالبانو شارډز افیر احضار کړی دی .
