پاکستان له هندوستان سره د پټو مذاکراتو وړاندیز رد کړ

پاکستان د کشمیر په سر د پټو خبرواترو د پیلولو لپاره د هندوستان وړاندیز ته منفي ځواب ورکړی دی.

د پاکستان په حکومت کښې خبرې سرچینې وايي: د ځینو هیوادونو له هلوځلو سره سره د اسلام آباد حکومت له هند سره د پټو مذاکراتو د پیلولو وړاندیز رد کړی او د دواړو هیوادونو ترمینځ د څرګندونو مذاکراتو د شروع کیدو غوښتنه یې کړې ده.

یادو سرچینو ادعا وکړه چې پاکستان ویلې دي یوازې په داسې صورت کښې خبرواترو ته تیار دی چې د هندوستان حکومت په کشمیر کښې کرفیو ختمه کړي او د دغې سیمې خودمختاري یوځل بیا په قانوني توګه په رسمیت وپیژني.

د پاکستان د خارجه وزارت ویاند هم په اسلام آباد کښې په خپله اونیزه غونډه کښې ویلې وو چې له هندوستان سره هیڅ ډول ناڅرګند او پټ مذاکرات نه دي روان.