پاکستان کښې هم د کرونا له امله د وژل شویو شمیر زیات شو

په پاکستان کښې د کرونا وایرس له امله د مړو شویو کسانو شمیر ۶۳ تنو ته رسیدلی دی.

د پاکستان روغتیا وزارت نن وویل چې په دغه هیواد کښې په کرونا ناروغۍ د اخته کسانو شمیر ۴ زره او ۳ سوه ۴۴ ته رسیدلی چې ۶۳ تنو په کښې سرونه بایللې دي.

د رسمي احصائیو له مخې په کرونا د ککړو کسانو زیات شمیر په پنجاب صوبې پورې اړوند دی چرته چې ۲ زره او ۱۸۸ تنه په کرونا وایرس ککړ شوې دي.

په عین حال کښې نن په پاکستان کښې چیني ډاکټرانو وویل چې د کرونا د ناروغانو د شمیر مخ په زیاتیدو بهیر ښودنه کوي چې پاکستان له یو خطرناک راتلونکي سره مخامخ کیدی شي او دا احتمال شته چې په دې هیواد کښې د کرونا ناروغانو شمیر، له رسمي احصائیو ډیر زیات وي.